AGGIORNAMENTI

La video-intervista del 2000 a VTC su "La fabriche dai predis"

Come ch'i dîs simpri, al’è un grum dificil scrivi alc di un ch’a l’è muart, seti parceche nissun di nou al po conossi a font une persone cuant ch’a è in vite, seti par vie che dopo a si riscje simpri di fâ nome o masse retoriche (il detacul latin “parce sepulto ac de mortuis nisi bene” sal puartin denti di nou).
Se chest muart po a si clame pre Toni Beline, la roube a devente alore une vore penge, quasi impussibil.
A mi a no mi reste che cirî di meti adum I MIEI RICUARTS, par jodi se chescj piçui tassei ai podin completâ ce ch’a mancje inta suage di chest grant personagjo, cussì sclet e cussì dificil da incuadrâ.

AGNS SESSANTE

Ai conossût pre Toni Beline maimò tal 1962, cuanche (jò frut di 11 agns, lui student di II° teologje di 21 agns) lu ai vût come assistent par dut l'an scolastic di prime medie tal seminari di Cjastelîr e par un meis a Bagni di Lusnizza, inta colonie estive di Malborghet.
Jò ai encjemò tal cûr e tal cjâf ogni fruçon di chei ricuarts ch'a si son stampâts par simpri inta mê memorie e che pre Toni al à savût cussì ben presentâ in cualchi bacon dal so libri plui famous "La fabriche dai predis".
Cuant che lu ai viodût il prin viaç a Cjastelîr, a mi ere sameât un preidi a la buine (no savevi che a nol ere inmò preidi), cu la tonie bielzà un tic curte (a sji viodevin simpri i bregons poiâts su las scarpes), cul golet di celuloide blanc ch'ai sciampave fûr inta cope, cun chel so nâs pleât in bande e chel so mût di cjacarâ cu la erre paularine... Cuant che lu ai clamât pa prime volte cuntun biel "Sjiôr santul", a nol à podût trategnisi dal petâ une grandiose ridade parcè che a nol veve mai sintût chel titul nè tantmancul inviât a lui, che a nol ere nè sjiôr nè santul. E nencje a nol veve mai sintût "parie e glon" come che jò vevi clamât la prime e la seconde sunade dal campanel ch'al regolave dute la vite interne dal seminari (da svèe as 6 di binore fint al "coprifuoco" as 9 di sere). Insome vin tacât il nosti rapuart cu la ridade e la maravèe e cu la scuvierte, da bande sô, di une Cjargne inesplorade...

La Prime Medie sez. C a Cjastelîr tal an scolastic 1962-63, fûr da capele dal seminari.
L'assistent pre Toni Beline, di 21 agns, al è adalt a çampe, cu la tonie

PRE TONI IN CAMERONE
Intal cameron (dulà che a si lave a durmî) nou fruts vevin i nostis iets a viste, un dongje chelati, separâts nome dal sgabel di len; daûr da cocjete di fier a sj picjave il capot e la gjachete; invezit la roube di blancjarie a si la tegnive inta colombere (armarut cuadrât, spes invadût das furmies, che a si viergeve sul davant cuntune ribalte: denti a sj meteve encje cualchi goloset di cjase). Tai cjantons dal cameron as ere disponudes las tendes di prefet e assistent, ch'as veve la funzion di mantegni un sclip di privacy par chescj doi teologos che ai veve il compit, oltre che di studiâ par lôr cont, encje chel di tegninus di vouli. Jò eri di front da tende dal prefet (Giordano Simeoni), chê di pre Toni a ere su chelati cjanton, daûr dal gno iet. In chest cameron situât parsore dal refetori, di cessos a'nd ere nome cuatri (a la turche e simpri cence cjarte igjeniche!) par passe 40 fruts (in chel cameron erin nou di prime C e une part di prime B cul lôr assistent Rolando Roiatti). Di lavandins, nome cu l'aghe freide d'estât e d'invier, a'nd erin si e no 10-12: sichè duncje a tocjave fâ la file seti par lavâsi che (pieis incjemò) par lâ tal cesso; cence dî che in chel an (no ai mai capît parcè) al ere proibît di lâ a pissâ la sere (a si scuegneve fâle prime, durant la ultime ricreazion das vot e mieze) e par vie di chest proibiment, tancj di nou a la fasevin dispess tal jet...

Un iet intal cameron a Cjastelîr dal '62

Poben intal cameron a'nd è sucedudes di cuetes e di crudes. Une sere ducj i prefets e assistents a si erin cjatâts par ricuardâ (crout) l'aniversari da vestizion (cussì ai veve det) e a si erin radunâts ta sale sot da capele a baracâ; par tegninus bogns e fâ crodi che ai ere inta lôr tende, seti pre Toni che il prefet, ai veve bandonât cuacjos cuacjos il cameron lassant impiât il lôr abat-jour; chel dal prefet però al ere masse dongje dal nailon ch'al cuviergeve la tonie picjade, sichè, viers miezenot, lant che ducj nou durmivin, nailon tonie libris linzui ai cjape fûc cun flames che a si alzavin fint a pleâsi sot il sofit. Nou ducj, dopo vei capît che a nol ere un sium, terorizâts, vin començât a butâ aghe cu las taces ch'i vevin ma no zovave: il fûc al cresseve. Alore un di nou al è lât a sunâ la campanele a dute bire: il prin a rivâ in pigjama al è stat il viceretôr Vescul (a si clamave proprit cussì di cognon) che a nol capive cemût mai che a no fossin in cameron nè prefet nè assistent. Insome a fuarce di fuarce sin rivâts adore di distudâ il fûc ben ben cuant che ai son rivâts prefet e pre Toni, ducj sbarlumîts e maraveâts: l'organizadôr da baracade clandestine al ere stât pre Toni che cussì a sji veve cjapât une lavade di cjâf dal retôr Tosoratti.
Cuant che a nol ere il prefet (simpri plui sevêr dal assistent), pre Toni a nus lassave un tic libars di fâ ce ch'i volevin: saltâ, cjacarâ (al ere proibît cjacarâ in cameron), mangjâ alc fûr vie (al ere proibît mangjâ in cameron, a sji podeve bevi nome aghe e zucar, che ducj a si ingegnavin a tegni in zoletes), lâ tal cesso a pissâ (une concession incredibil), tolisi pal cûl; poben une sere un di Tarvisio ch'al ere grant e gross, a fuarce di saltâ sul iet di fier, al è rivât adore di crevâlu e di pleâlu, cuntun fracass da fâ rivâ su adiriture il retôr in persone: pre Toni al à alore cirût di bonâlu e al è rivât adore di salvâ chel di Tarvisio da une sicure defenestrazion dal seminari ipso facto incurrenda.
Un viaç gno pâri (encje se a no si podeve) a mi veve portât jù une piçule casselute di mei nostrans ma inta colombere a no stave e no si podeve metile di nissune ate bande: alore pre Toni ch'al veve capît la situazion, al dîs a gnò pari: "Nissune pore, sjiorut, la cassele la platin sot dal gno iet dulà che nissun al ven a controlâ e vuestri fî al po lâ a cjoli miluçs cuant ch'al ûl. Però in'cjol encje jò".
Eco une prime cerce dal futûr pre Toni: al sta cul piçul, al difint il debul, a no i plasin regules e regolaments strambs e cence cjâf, fats nome par umiliâ la biade int e tegnile sotane, encje se cheste int a veve nome 11 agns.

PRE TONI IN CAMERATA, IN REFETORI...
La camerata a sares stade l'aule di scuele che il dopomiesdì a deventave aule di studi (das 15 as 16, das 16:30 as 18:00 e das 19 as 20, cuant ch'a sji lave a cene). In camerata ognidun al veve il puest di banc prefissât par dut il trimestre e nissun podeve sjielgi con cui stâ: al ere il prefet a disponi dut.

La camerata: il bancut di pre Toni a no sji lu iout, ma al ere dapît daûr di ducj, tal mieç da aule

Il prefet al sentave su la catedre alte dal professôr ch'a sameave un pulpit, l'assistent invezit al stave dapît, daûr di nou, intun bancut di fier e lamiere. A si stave ducj cidins, guai a cjacarâ cun chel dongje. Però il latin no ducj a lu capivin simpri benon o la matematiche. Ma ducj ai lave dal assistent a fâsi spiegâ o tradusji e pre Toni al ere simpri disponibil cun ducj, al judave ducj encje se ogni tant ai plaseve toli bonariamenti pal cûl cualchidun (plui di ducj me, par vie che eri roc e permalous).
Encje i siei compagns di cors ai rivave inta noste classe (Prime C) par consultâ pre Toni su materies dificiles come dogmatiche o morâl e lui al saveve simpri dâ une rispueste a ducj. Basti dî che i esamps di II Teologje nome lui a ju à dâts par latin, une roube ormai bielzà in chê volte straordenarie.
Cuant che pre Toni a nol ere in camerata, al ere a fâ il badant a un vecjo professôr paralitic, don Bulfon, che al veve bisugne di dut e ch'al stave inta ale riservade ai professôrs.
In refetori ognun al veve il so puest fis, ch'a si cambiave ogni trimestre; sul gustâ a miesdi a si podeve cjacarâ ma a cene a si stave ducj in silenzio a scoltâ un prefet che da un ambon di len al leeve un libri (il plui biel di chel an al ere stât "Il principe fantasma"). Il mangjâ al ere un grum scadent, pirons sedons curtiss di oton a noi ere masse nets, insome par fâle curte e dîle dute: un vêr suplizi par cetancj di nou! Ai prefets e assistents a ur davin un bacon di formadi in plui e un quintin di vin. Pre Toni, ch'al veve sicuramenti plui fan di nou, al dave vie spes il so formadi specie a cui che a nol rivave a parâ jù la mignestre (come il sotoscrit) e cuasi simpri al divideve encje il vin. Cuant che tal secont trimestri mi sei cjatât sentât dongje di lui, a mi, che a mi vegneve gomit nome a iodi i misteris (polpetes fates no si sa cun ce), pre Toni a mi diseve: "Lasse che lu mangji jò" e spess al mangjave encje la mê mignestre (sedinò scuegnevi restâ sentât aì cun vergogne fin cuant ch'i vevi finît dut, intant che ducj cheaitisj ai jessevin). Encje par chest pre Toni al ere deventât par me un protetôr e un grant amî e gno pâri ogni tant, par ringraziâlu di chestes atenzions, ai portave fûr vie (roube proibitissime) un pachet di spagnolets, che pre Toni (ch'a nol veve masse beçs da spindi) al fumave simpri vulintîr di cuintrebant cun cualchi so compagn di cors.
Pre Toni al ere encje bibliotecari in chel an, ven a stai ch'al veve di custodî e organizâ la biblioteche interne usade da ducj i students.
In plui al faseve ogni tant encje il cancelîr (stâ a vendi articui di cancelerie, savonetes, bascos ecc. intune stanzute) e al sunave l'armonium ogni tant in gleisie, cuant ch'al mancjave il titolâr Fant.
D'invier a si lave a "passeggio" das 13:30 as 15 pai prâts di Cjastelîr: pre Toni al usave metisji dintor une lungje manteline nere ch'ai rivave fint ai genôi e un colbac (la russe) sul cjâf: cussì infagotât al sameave pardabon il don Camillo di Guareschi ma lui a sji freave di sameâ a cualchidun e al pensave nome a no vei freit. No ai mai jodût pre Toni nè cul cuadrât nè cul saturno ch'ai usave i preidis in chê volte (crout che a no iu veibi mai comprâts, tant ridicui ch'ai ere!).

Dutes las trei sezions da Prime Medie dal an scolastic 1962-63 cul retôr Remo Tosoratti requie (intal mieç), i doi viceretôrs Rino Vescul requie e Plinio Galasso (in pîts di cà e di là). L'assistent pre Toni Beline al è in ultime file adalt, 5° da drete.

AGNS SETANTE

Par passe 10 agns non ai iodût ati il gno assistent di prime medie, che intal 1965 al ere deventât preidi e (ai savût dopo) al ere finît plevan a Val e Rualp in Cjargne.
Par câs tal 1972, intune riunion noturne dal Moviment Friûl in ta sede di via Palladio a Udin, cjati une sere pre Toni insieme cun pre Checo Placerean e pre Pieri Londero. Sei restât maraveât che chescj trei preidis (un al ere stât adiriture gno professôr di arte in Liceo) ai fossin intal MF, ma plui di ducj a mi veve maraveât pre Toni che al ere cambiât dal dut in 10 agns: un tic cjavelon, a nol veve ati la tonie ma al vistive cun maiutes e cjameses simpri masse colorades e fûr di tono, al mi cjacarave nome par furlan e al veve iniment nome il Friûl e la sô storie, quasi une mono-manìe...

Durant la campagne eletorâl regjonâl dal '73, lu iodevi che al girave cu la sô Cincent par ducj i borcs di Cjargne a fâ comizis cuntune antighe foniche e insieme sin encje lâts a Paulâr pal Duron...
Tal timp, cun aitisj preidis, al veve dât adum il CIRCUL CULTURÂL "CJARGNEI CENCE DIUS" che al veve tacât a publicâ sagjos su la storie dal Friûl e soredut sul Patriarcjât di Aquilèe e su chestes tematiches al veve dât dongje encje un grop di studi e di confront clamât GLESIE FURLANE che a veve come scopo principâl la riscuvierte da storie di Aquilèe inta otiche di une valorizazion e di recupero di chel patrimoni storic e culturâl.

Dopo chest casuâl contat tramite il MF, vin tornât a començâ a iodisi, encje se raramenti: jò lavi ogni tant a sô messe la domenie a Treli e lui, cuant ch'al vignive in esatorie a Paluce, al passave a cjatâmi.
A Scense a si iodevisi ogni an a San Pieri pa bussade das Crous, che propit lui al veve volût rinovâ e valorizâ dopo tancj agns che cheste antighe cerimonie a stave lant simpri plui al mancul. Pre Toni al ere un grum onorât e lusingât di iessi canonic di cheste catedrâl cjargnele che a ere stade sede di un vescul fint al VIII secul e che cumò lui al intindeve recuperâle par tornâ a fâ vivi la fede in Cjargne (sô mari a ere une cjargnele di Davai di Lauc).
Ma la noste amicizie a è stade ben ben saldade tal 1978 cuant che pre Toni al à scugnût iessi operât di un brut infart intestinâl tal ospedâl di Tumieç: in chê ocasion sei lât cun lui in sale operatorie e ducj vin penât avonde in chês tragjches ores. In cheste ocasion ai encje scuviert che pre Toni a si ere metût a scrivi, parcè che a mi veve regalât il so PINOCCHIO, fresc di stampe, insieme cu las Flabes di FEDRO e di ESOPO e soredut il so magnific SIOR SANTUL. Ai ere vanzât timp encje par descrivi il so piçul mont cjargnel, cun stories di omps e di femines, in MISTERIS GLORIÔS.

AGNS OTANTE - NOVANTE & DOIMIL

Cuant che, dopo cheste brute operazion (al ere restât cence un lunc toc di intestin) pre Toni al è stât trasferît in Furlanie, no ai vût mût di jodilu ati, se no raramenti. Si telefonavin propit ogni tant, la sere, sedinò jò lu mandavi a saludâ simpri par sô sûr Eline o sô gnece Monica (ch' as lavore inta Sanitât dal "Alto Friuli").
Cuant che dopo a è stade ricoverade la sô vecje mâri, ai tornât a iodi pre Toni e cussì encje cuant che cualchi preidi di Glesie Furlane al ere malât e ricoverât.
In chestes ocasions, a si cjacarave das noves in Cjargne o das sôs ultimes publicazions. Cussì tal Nodâl 1994 a mi paurte "Fortunât il popul che il Signôr al è il so Diu"; il 2 di fevrâr dal 1998 a mi à portât la " BIBIE" in furlan e il 10 di fevrâr dal 2000 "La fabriche dai predis" e ducj cuntune dediche particolâr e simpri comovent:

Sei stât nome dôs voltes a cjatâlu a cjase sô a Visepente: un viaç cun Mario di VTC (VideoTreppoCarnico) par une interviste e un ati viaç cun pre Mario Niar di Paulâr. Ricuardi inmò cheste cjase ch'a puçave di vedran e di gjats, in amabil disordin, dulà che libris e pagjeles a si cuntindevin lucs e lusôr. Sul salâr al veve statues di len di sants e messai vecjos e un legjio.
Cence dî nue, la seconde volte, a si met su la machine da scrivi e a mi bute jù d'un colp "Par dut al è il so moment, un timp par ogni robe sot dal cîl" une serie impressionant di timps, dopo al plèe il sfoi e m'al dà (lu conservi simpri intun so libri, come une sorte di litanie sapienziâl da no pierdi nè dismenteâ).
Cuant che al à començât a malâsi di rognons, a mi veve telefonât encje a mi par iodi ce ch'i pensavi da cure "Di Bella" che in chel timp a faseve furôrs: jò no ai vût coragjo di dineâie ma cuant che dopo al à tacât a fâ la dialisi, encje lui al veve capît che a no veve conventât a nue.
E la dialisi a è stade par lui un cambiament totâl di vite e di rasonament su la vite...
Tal 2000 su cheste Cjargne Online, simpri cun Marino Plazzotta, vin burît fûr l'idèe da restaurazion da DIOCESI DI ZUI e pre Toni a nus mande plui di cualchi articul favorevul in merit, encje se al fâs capî che in fonts cheste a restarà nome une grande utopie cjargnele...
Tai prins agns dal nûf secul, pre Toni, probabilmenti dopo lungjes riflessions sul iet da dialisi e tas nots cence sium, al parturiss la sôs opares plui impegnatives filosoficamenti e culturalmenti, opares che as restin i pilastris fondamentai dal so pinsîr e dal so mût di iessi.
Ricuardi par ducj: IL TIMP DES DOMANDIS, ET INCARNATUS EST, DE PROFUNDIS e il so ultim libri-interviste LA FATICA DI ESSERE PRETE (metût adum da Marino Plazzotta e publicât cuatri dîs dopo ch'al ere muart) dulà che al ven sintetizât par talian dut il so pinsîr...

DEBOLECES DI PRE TONI
Sicuramenti la figure di chest predi, massime tai ultims agns di vite, a reste problematiche parcè che, se a presente une vore di pregjos e di cualitâts come ch’i vin jodût parsôre, a manten e a pant encje cualchi debolece, che dutcâs a no sminuis il peis globâl da personalitât di pre Toni.
La prime di chestes deboleces, seconti me, a è costituide da une specie di schematismo mentâl quasi dogmatic e manicheo che pre Toni al nudrive: di une bande i bogns, i disubidients e i biadaçs; di chê ate i triscj, i rochei e i massepassûts; e pre Toni al veve il viziut di metisi simpri intal prin grup, cence scrupui...
Da cheste rigjde vision, a derivave la sô ostinade rivalitât ideologjiche cu la gjerarchie gleseastiche, che, pur meretant dispes series critiches encje da bande dal scrivent, a conserve simpri la specificitât di iessi l’uniche istituzion umane (e quindi cetant falibil) che à savût, ben o mâl, tignî dongje la Gleisie Catoliche in periodos cetant neris e dificî (la vessino i Luterans o i Ortodos cheste gjerarchie, massime cumò ch'ai son ducj sparniçâts e cence masse grinte!). Se pre Toni al ves valutât miôr encje chest aspiet, forsit al vores vût plui misericordie par papes e vescui e mancul sigurece pas sôs opinions. Dal rest parfin S. Ambrogjo, cun chel "Casta meretrix" riferît a Gleisie, al veve pandût plui misericordie par cheste struture umane...
Un’ate forme di debolece a è stade la sô posizion di pacifist unilaterâl e di strenuo opositôr di dutes las declarazions uficiâls da Gleisie Catoliche in ambit etic (abort, eutanasie, muart), sessuâl (matrimonis gay, copies di fat, uteros in afit, pirule dal dì dopo, maris-nones), morâl (vuere, adozions, embrions, clonazion), come se la Gleisie, usance pre Toni, a no ves di impaçâsi encje dal om real di vuei ma a ves nome di restâ sierade in canoniche o in sacristie a dî rosaris e novenes, cence fâ sintî la sô vous libare e autorevul (ma no autoritarie), massime in dì di vuei cun dut ce ch’and è pal mont e in Italie, dulà che la nove religjion civîl relativiste-nichiliste a impon ogni dì su ducj i mass-media talians l’agjende socio-politiche che à une sole regule: lassâ cjacarâ ducj su dut, ma stropâ la bocje a Benedet XVI (jout il fat da Universitât "La Sapienza" di Rome, dulà che il vescul di Rome a nol à podût meti nencje pît), un pape che encje culturalmenti e inteletualmenti (oltre che teologjcamenti) a nol tem confronts cun nissun e al à ce insegnâ a tancj di lôr, massime ai cristians e soredut ai predis che cualchi volte ai si ritegnin papes... A è restade nome la Gleisie a scombati pal om reâl: se a no foss la Catoliche, dulà saressino bielzà rivâts?
Un’ate debolece di pre Toni jò la cjati tal so mût di ricuardâ il so seminari cun chel libri che par me (e jal ai det e scrit plui voltes tai agns passâts) al è nome une impietose autopsie di un cadavar riesumât a passe 30 agns da muart, là che une autopsie a si à di fâle simpri cun cetante pietât sedinò a devente “vilipendio di cadavere”. E po: une autopsie a covente par capî las causes platades di une muart repentine o par indagâ a fin di ben une maurt incomprensibil o ben par prontâ eventualmenti alc di rimiedi pai vîfs. Fâ une autopsie dopo 30 agns da muart a ce covente? A po coventâ al judiç, tratantsi di un delit; ma intun câs di muart naturâl (come chê dal seminari) a si po’ dî nome che al è un at culturalmenti inutil e praticamenti superfluo. Massime se in cheste ricognizion cadaveriche tardive a si esaltin nome i aspiets umans negatifs cence nomenâ mai chei, pous o trops, positifs.

PAS ULTIMES

L'ultim viaç che ai iodût pre Toni, al è stât tal meis di avost dal 2006, cuant che cul so amî Romano Michelotti al ere vignût su a Trep in Cjargne per une interviste a VTC.
Vin vût mût di cjacarâ pouc, ma il so aspiet fisic a mi ere parût bielzà une vore fruiât e il so cuarp pleât da lungje e inesorabil malatie, ingrispît e suât-su da une dialisi impreteribil.
Ma il so spirit al ere simpri chel: indomabil, sclet, sgrifignant, nudrît da sapienze di Diu.
D'in chê dì no lu ai iodût ati, ma il so spirit al è simpri tal gno studi, enfre i miei (siei) libris, achì in Cjargne Online, dapardut dulà che la sô peraule à vût mût di esprimisi e di rivelâsi.

Alfio Englaro
Paluce in Cjargne, 12 di dicembar dal 2007

2012(V aniversari da sô muart)

In ta ricorence dal V an da sô muart, l'asociazion culturâl "Glesie Furlane" intune cu "La Patrie dal Friûl" à burît fûr un DVD c'al presente l'interviste che pre Toni Beline al veve lassât a Celestino Vezzi intal studi di VTC (VideoTeleCarnia) a Trep, intal 2000, juste un an dopo la publicazion dal libri "La fabriche dai predis".
Cheste interviste, che a ere lade in onde in Cjargne, a veve un tic sustât cualchidun ma cence nissun scandul, encje parcè che in chê volte cheste lungje cjacarade a ere restade conossude e pandude nome in Cjargne.

E l'argoment di cheste lungje cjacarade a ere stade incentrade dute su chest libri penç e savorît, c' al contave la storie dal seminari di Udin dal pont di viste e cu la sensibilitât di pre Toni. Dute l'interviste duncje a si ere svilupade ator dal seminari e dai siei atôrs, vignint fûr cussì une buine ore di "file" dulà che pre Toni al veve podût clarî cetantes afermazions e tornâ a "scandalizâ" plui di cualchidun...
Cumò cheste lungje interviste a ven distribuide da chestes asociazions che vin det parsore e cussì pre Toni al tornarà a vivi e a "fâ scandul" encje dopo muart, propit parcè che dut ce c'al dîs a Vezzi al samèe roube di vuei, roube atuâl e no pâr vere che a seti roube di passe 12 agns bielzà.
Encje se, a tocje dîlu, no dut ce c'al sosten pre Toni al è condivisibil parcè che lui, come encje Giorgio Ferigo, al veve simpri la pice di strabiliâ e di maraveâ il so uditori, a cost di lâ parsore las ries o fûr dal semenât.
Doi cjavatz cjargnei lâts masse adore in chelati mont, dopo di vei lassât une profonde e impreteribil ferade inta chest.