Un piçul ricuart, une vôre personâl, par chei bacons di strade ch’i vin vût mût di cjaminâ insieme.
Nassût a Felet tal 1943 e incjasât in Cjargne dal 1966, a Tierç di Tumieç; Renzo, dongje dal lavôr, al à simpri vût a cûr i aspiets storics, lenghistics, culturâi, tradizionâi, esistenziâi dal Friûl e da Cjargne e cheste passion la cjatìn cence fal in ducj i siei scrits e tas sôs publicazions. Une passion che lu à puartât a impegnâsi in prime persone in tantas iniziativas dulà che al si è metût in giûc.

Tal 1985 vin metût inpîs la ‘Clape Culturâl Cjargnele Stele di mont’ cun chê di dâ fuarce e sbarniçâ la culture ladine-furlane di tradizion cjargnele; a nas cussì encje la ‘Fieste da Culture Cjargnele’ che peregrinant pai paîs da Cjargne par 15 agns à fat conossi i autôrs cjargnei, tirant dongje i lôr scrits ta antologjie ‘Âghe di Fontanon’.

Dal 1983, in chê ch’a ere la radio cjargnele ‘Radio Stereo Carnia’, di setemane in setemane vin puartât indavant ‘Il Fontanon’ che come frescje risultive al entrave tas cjasas cun dut ce che al riguardave la noste cjere.

Inmò la Cjargne e i siei problemas, tal 1995 par dâ vite a Union Autonomiste Alpine sot il sproc ‘A decidi l’avignî da mont ‘e à da jessi la int ch’e vîf in mont’.

In cheste suage la lungje liste di colaborazion cui siei scrit tai sfois ‘Int Furlane, La Patrie dal Friûl, In Uaite, La Vite Catoliche’ e po’ inmò ‘Ladins dal Friûl’ da lui fondât tal 1998 e curât cun passion fintramai al ultim numar dal meis di otubar, periodic di informazion e culture sul cont de minorance celtiche dai ladins de Furlanie.

Tal 1982 cun Agnul Pitane e aitis al fâs nassi l’Union Scritôrs Furlans, daventant dean tal 2004 e firmant la riviste ‘Gnovis Pagjinis Furlanis’.

No dome gjornalist publicist, ma encje scritôr e la sô produzion, tant in prôse che in poesie, a conte un biel numar di operas e publicazions e fra chestas encje cualchi traduzion.

La sô valence tal cjamp da culture j à meritât il Premi San Simon tal 1983, il Premi Friûl tal 1987 e il Premi Nadâl Furlan tal 1993.

La sô grande passion pa lenghe lu à viodût presint dispès a TeleAltoBût e, fintramai ai ultims dîs di vite, insegnant tal cors di lenghe e leteradure ladine furlane ta Universitât da Tierce Etât da Cjargne dulà che al à curât ben 14 numars da golaine ‘Cuaders di culture cjargnele’ che al met adun, come che al scrîf lui stes, ‘moments significatîfs dal nestri patrimoni culturâl e uman’.

Une vite interie dedicade a fâ conossi il Friûl e la Cjargne cence mai imponi, ma presentantsi cun gracie, sensibilitât, delicatece, scletece; un mût di ponisi risiervât, ma sclet, ferm e convint soredut cuant che si tratave di difindi i dirits e i valôrs di cheste cjere e di cheste int.

Tal clip di un sorêli flap, il 8 di novembar 2016, al si è distudât e ‘al è rivât il cidinôr.

Mandi Renzo

CELESTINO VEZZI