 |
Giacomo Fabiani |
Dalla raccolta 'Faliscis'
Amôr
(scarica il file mp3 - 84 kb - recitata da Celestino Vezzi)
Come 'ne frute
tu fevelis
peraulis d'amôr
cui gjeranios e i ciclamins
dal to balcon.
E jo ti scolti
e ti cjali
tai vôi
saneôs
di fevelâ cun me,
indurît
tai miei pinsîrs.
Murî
(scarica il file mp3 - 59 kb - recitata da Celestino Vezzi)
Ognidun
al mûr dibessôl,
stringint i dinc'
su la feride
dal cuarp
slambrât
da l'anime
ch'a lu bandone
a un grum di cjere.
Forest
(scarica il file mp3 - 144 kb - recitata da Celestino Vezzi)
Viodi il soreli
da un balcon
ch'a nol è il to,
la lunedì
ch'a no lûs
sul to ort,
lis stelis
ch'a no si plàtin
daûr das tôs monz
su lâ da gnot;
sintî lis stradis
ch'a spùcin di benzine,
ch'a no nûlin
di fen o di polente;
incuintrâ int
simpri vistude di fieste,
ch'a no dà plàit
al forest…
t'ingrope
il cûr:
là che il to paîs
al cjante vaint.
Cence mèriz
(scarica il file mp3 - 168 kb - recitata da Celestino Vezzi)
A pocje strade
das puartis
dal gran misteri,
mi incuarc
che no ài nancje
un regalut
di puartâ al Signôr.
Lis mês sachetis
Son vueidis dal dut;
dome tal sachetin,
dongj dal cûr,
o ài un pugnùt di Fede
e, di buinis oparis,
propit un gucjarìn.
Ce pôc, Mari di Diu!
Ce vergogne, defonz miei,
ch'a crodevis di fâ, cun me,
biele figure!
Zontàimi alc dal vuestri:
come simpri.
E domandàigj scuse
par me: us scoltarà!
Di sigûr, us scoltarà!
Vècjos
(scarica il file mp3 - 160 kb - recitata da Celestino Vezzi)
O vin
sêt
di pâs,
fan
di famèe,
voe
di afiet,
gole
di cjalt,
bisugne
di puisie,
ànsime
di vivi par alc,
brame
di stime.
Ma dut al reste
suspîr.
O sin, par duc',
dome vanzùms!
L'ore juste
(scarica il file mp3 - 120 kb - recitata da Celestino Vezzi)
'A fevèlin ancje
di te, omp,
butât in bande
come 'ne siê sdenteade.
E ogni tant,
a vègnin a cjatâti,
vosanti tas voreles
che la fuarce dai cjei dirìz
a è tas tôs mans!
Strope il nâs e las voreles:
a son patocs e bandaròtz!
Ridiur intôr!
Sol quant che
las tô mans
creturadis da vite,
a vignaràn onzudis
cul vueli da l'amôr,
da int mandade da l'Amôr,
spalanche i vôi, las voreles,
il cûr, i braz
e cjamìniur daûr.
A è l'ore juste!
