Rosarie la Todescje
di Elio Craighero
Cussì a clamàvin Rosalie Vikler, nassude in Carinzie das bandes
di Spittal viers il 1870 e dulà ch’a veve vivût fin tal 1915. Lavìe a veve
conossût Gjoachin, fî di Tite di Minicuét e di Anute la Dolce, secont di 15 fîs,
nassût a Sciaj tal 1872. 
Gjoachin, incjamò frutat, come ch’a sci usave in chei timps, al veve tolet su pa schene la crascine dai guzzadôrs e lât a cirî furtune vie pa l’Austrie, chê furtune ch’a nol à mai cjatade in vite sô, parceche s’a lu vedeve di lontan, a gambiave strade. Cussì, lant a oselâ lavôr, domandant di durmî pai stâlis e tanc’ viaz cirint encje une bocjade, al sci é imbatût cun Rosarie che, al mi diseve iei, in chê volte al ere "un biel pùa" e a no à stât tant a pensâ sôre e à metût su famee cun lui.
Dal lôr maridaz son nassudes 5 proles. Ma se la furtune a gambiave strade quanche avedeve Gjoachin, encje a Rosarie no sci é mai fate jodi. Une vite grame la sô! Fin quanche l’é vivût il pâri, un poc a j dave par judâle a tirâ indevant, ma, soterât il pâri, al é stât soterât encje l’aiût, cussì che iei e i fruz, àn comenzât a fâ conoscince cu la miserie todescje. Gjoachin nol ere un mâl om; plen di salût e di voe di fâ dal ben, al sci dave da fâ ogni dì a pocâ indevant la sô crascine sot la ploe e sot il sorêli, ma i saveis duc’che a fâ tante fadie sci fâs seit e la bocje a dopre il sò, no sci pò patafâle simpri, bisugne dâi chel ch’a j covente s’a sci vûl tegni dûr. No zovave che la Dolce a j veve insegnât di tignile almancul ogni tant sierade,"parceche, a diseve, a é pizzule, ma a mangje un paîs!".
Ma la Dolce a stave sentade in ta l’ombrene in ta cort dal Cristil, no a pocâ la crascine e fâ girâ la muele de guce!
Ma alzant masse il comedon, a Gjoachin no restavin palanches da puartâ a cjase dulà che la miserie a faseve da parone e duc’ j saveis ch’a é la mâri da discordie e in famee ad’an provades di "milesignati".
Par finî di comedâ dut, a é scopiade la guere dal ’15. I todescs àn cjapade Rosarie e i fruz e ju àn mandâz a Trep, paîs di origjne di Gjoachin, e lui al é stât internât t’un campo di concentrament da dulà che lu àn molât nome a guere finide.
Cussì il meis di giugn dal ’15 a é rivade achì chê biade int, cence savei dulà rifugjâsci, dome cun chel che puartave in duéss e cul cîl par tet. Nol ere fazil cjatâ alogjos in chei timps e il cumun nol à pudût fâ di miei che logâju in chê cjasute mieze dirocade a ridues dal stâli di Sbevorcjes, fûr dal paîs. Aì àn vivût dut il timp di vuere e alcdopo. Fasevin dûl a duc’, ma cui podévie judâiu in chês anades? Nome sciore Luzie dal mestri, che in cjase sô il lavôr nol mancjave, e à ufiert a Rosarie di vignî a vôre e se ancje siore Luzie a veve un caratar dûr e une mûse da fâ poure, a cjatave ogni dì alc di meti tal grim a Rosarie, parceche a vés puartât ai fruz.
Iò j ài incjamò in tai vôi chêlungje femine scarmide, palide, simpri vistude di neri, che mai no l’ài viodude a ridi, che mai no à imparât a cjacarâ come nou, ma simpri messedât talian, furlan e todesc. Toleve dut ce che a j davin, ma no domandave mai nuje. In cjase dal mestri, oltre ai lavôrs d’ogni dì, a j tocjave di fâ encje la làve grande in ta liscivère da cort. A faseve dûl viodile plete su chel podenon eno sai cemût ch’a faseve a remenâ chei linzulons dûrs di tele di cjase., che scugnive sfregolâiu toc par toc cun savon misurât e cence spàzule.
I viout incjamò chês mans di vieile cu la varete cunsumade tanche i siei deiz. Chel da làve al ere un lavôr di fadie, lu cunsiderave encje la parone tanch’a j puartave jù un tic di marinde prime e dopo miesdì: un pagnut cul companadi e un cuartìn di vin, "parceche, a diseve, nissun lavôr al sfibre tant come chel di stâ dut il dì cu las mans ta l’aghe". Quanche veve un moment di timp vignive encje la sierve a dâi une man. Cul lâ das ores la blancjarie a sc’ingrumave spietant il moment di jessi poiade tal podin grant e di cjapâ il batisim de aghe di bol. Quanche a ere dute pronte, ben fissade, poiave parsôre il coladôr, pò la cinîse che veve di jessi simpri di buines legnes di fuee. Parsôre de cinîse, se ere, qualchi fuee di orâr, parceche vés cjapât plui bon odôr, pò jù l’aghe bolint. Al ere un sostentâsci dal odôr di nasebon ch’al ere dapardut! Finide l’opare, Rosarie sci suiave las mans tal grimâl, sgarfave fûr da sachete une cjartute cun tun tic di tabac e a diseve a cheâte:" m’al à dât vuei binore scioreMinute, a mi à det ch’al pare vie las malincunies, ch’a toli encje iei une prêse, signurine, al é bon, sante justine, al fâs ben, al svuaie la memorie!". Ma la signurine no voleve. La sere, s’al vignive ta l’ostarie qualchi pué, ce varessiel det se nulive di tabac? Tal doman Rosarie a tirave fûr dal podin la roube, la strizzave pulît, la meteve in ta cosce, pò a doveve lâ sul lavadôr di Genodes a rosentâle; la parone no voleve ch’a fòs lade sul lavadôr di Trep: la roe a passave pal paîs e no sci fidave che l’aghe fos nete. Metude a suiâ su las cuardes che sciore Luzie veve tindût tal ort, a Rosarie lusivin i vôi di sodisfazion: "Che viodi mò, sciore parone, blancje come dint di cjan!". E la roube a ere veramenti nete.
A cumò mò, la Divine Provedenze e à proviodût. Fra tantes invenzions a é encje chê da lavatrice, che Diu rindi il merit a che ch’al à metude adum! Cumò a runtine par ogni cjase! Iò i pensi:" Se Rosarie a fos incjamò vive no sai se sci lasarés convinci dal Omo, dal Ava, dal bianco che più bianco non si può! Val a dî che doprares incjamò las mans e la cinîse.
Ma nol ere nome il lavôr e la miserie il martueri di Rosarie, ma chel di viodi distrugi la famee cun chel brut mâl de tisi e par chê, a chei timps,nol ere incjamò cjatât rimiedi. La Edvige a é muarte a Spittal in Austrie, prime che fossin vignûz in Italie; la Gjovane a veve maridât un di Ciurciuvint e no ài mai savût ne rem de sem di iei; Sualt di disenûf agn, malât tal 1917, tal an de invasion nol ere pussibil nissun ricovero in ospedâl par un italian, a fuarce di bati, Vigj dal Faress e Silvio di Cortoleces àn otegnût di podeilu ricoverâ tal ospedâl militâr di Bologne, dulà ch’al é muart l’an dopo; la Line, nassude tal 1907, a é muarte tal ospedâl di Tumiez tal 1931; la Ane, dal ’11, e à tignût dûr fin tal 1982 quanche a é muarte improvisamenti sul treno che la puartave a Lourdes. Gjoachin ch’al lave fasint simpri qualche sabecul vie pai siei gàis in Tirûl, il 14 di avost 1939, mentri ch’al stave pocant la sô crasine sul stradon di Pieve di Cadore e dopo vei distudade pulît la seit in chê dì, al é stât cjapât sot da un camion che lu à copât dal moment parant in patràs lui e la crascine. Rosarie, intorn ai 70 agns, a é lade encje iei cun Diu, par scuedi al Signôr un tic di chel ben ch’a nol veve mai vulût dâj a cajù.
tratto dal Bollettino Parrocchiale "La nôste valade"
