La "sedule"

di Elio Craighero

IN ITALIANO

Ben pòus al di di vuei savaran ce ch’a è la sedule. A son pòus encje chei ch’a san che par parâ vie la seit a è buine encje l’âghe. Nissun plui met par cjere mans e genôi par poiâ la bocje ta surgjve par bêvi e cussi podei fâ conoscince cun chê mostro di besteute tant malfamade che sci clame sedule. Cumò sci va a fâ picnic puartantsi devûr la’Gocie’ il ‘Sprite’, la ‘Fanta’: dutes bevandes tant buines , che fasin tant ben pa salût, e son une delizie a parâles jù, ma jò us garantis che se sci met denti la sedule a reste crepade dal moment, intoseade. Duncje la sedule a è chel viermut , lunc tanche un anglagn di fîl,blanc, candit e sutîl ch’al vîf ta l’âghe frescje e limpide, tai riuzzons e tas surgjves di mont. Il non par talian no pòs dîusal, parceche nencje jò i no lu sai. I vieilis nus racomandavin simpri di badâ pulît quanche sci beveve, parceche se al fos lât jù pal grasalâr, sci podeve vei brutes conseguenzes, la besteute vares pudût forâ i bugjei e alore sci scugnive muri: di coliches. Une sere dal meis di otoubar Manè dal Sâl e il so om Titut a son lâz jù in cjase di Shulit par tornâ l’impromût a Luzie a disfueâ il sorc come che sci usave in chei timps. Grums di panôles, grums di filêrs, grums di petegolez, grums di ridades e l’opare a lave indevant a vint e a vele.Titut al veve fate seit e al disè a Nelut:" Dami un got di âghe, nin". Il frut, ubidient, al à jemplât il cop tal cjaldîr e a j al à dât cence badâ che das panôles a ere colade denti une sede e che Titut al è inacuart nome quanche al stave finint di bêvi e ormai a j lave jù pal cuel. Al a comenzât a ramenasci su pa cjadree, a sbufâ, pò al sci è jevât su e al a det a femine:"Nene, anin!". "Ce dal diaul veiso usnot, po mostro di om, che sameais une anime in pene?". "No ajo bevude une sedule! Nene di cûr che in vincjequatri ores j sei muart, anin su cjase, dami pene e ingjostri chi fâsi testament!". "Pò no saveiso che in cheste stagjon las sedules no girin, che vegnin fûr nome te canicule, in estât?". "Pò, j l’ài viodude cui miei vôi, i mi sint a forâ za su la bocje dal stomi!". Nene e à scugnût dâi il content, lâ, dâi dongje cjarte e ingjostri par ch’al fasi testament dongje chei tanc’ ch’al veve fat e ch’a nol saveve ce fâ di lôr; ma in chê sere nol è rivât adore di butâ jù une rie di tant ch’a j ‘trimave la man. La femine a fuarce di predicjes e soredut cu l’aiût di un got di sgnape a è rivade a bonâlu e fâlu lâ tal jet. In tal doman par Trep duc’ savevin che Titut al veve glotude une sedule. Tanc’ ridevin, qualchidun spietave di sintî il bot de angunie, ma la maiôr part a jesolave la biade Nene e no saveve cemût che sapuartave chê crous di om.

Tal doman, dopo gustât, dongje il fûc al stave spietant incjamò il mâl di panze ch’a nol rivave. "Nene, dami un busulut di sgnape!"." Pò, nencje une lâgrime, contentaisci di chê di nosere!". Imbardit, l’om sci è trat su il tabar e al à cjapât la strade par Sciaj. In Palût al à incuintrât sciôr Toni di Zilie :"Salve, Toni!","Salute, Titut, indulà laiso pò?", "I vuei su dal Pin a bêvimi un decimin!", "Pò seiso mat a lâ a torn in chest sest?", "Parce, mo, Toni?", "I seis malât, cjamât di fiêre, no viodeiso ce ros chi seis?", "Magari,ve’ tu, i mi sint ben cori i gjaz su pa schene!", Us prêi, Titut, tornait a cjase, lait diret in tal jet e fasceitsci dâ alc da done Mane che no seis in cundizion di lâ pe vile". Titut al à voltât i talons e al è tornât a cjase e cence entrâ in cusine dulà ch’a erin duc’, al è lât su diret in ta cjamare, sci e comedât in tal jet e al à taponât encje il cjâf sot la plete. Nissun al ere rivât a viodilu. Al passave il timp e Titut a nol tornave; a è vegnude l’ore di cene e a nol rivave. Nene, sustant, a disè as fies:"Cumò i lais une par Trep, une par Zenodes e une par Sciaj; i faseis fûr dutes las ostaries. Se no lu cjatais, cjalait pulît in bande da strade ch’a nol sêti colât cjoc". Las frutes e àn fat come che ur à det la mâri, ma a son tornades soles: in nissune ostarie al veve stât, nissun lu veve viodût. Manè a girave pe cjase disperade! A è lade su ta cjamare a sierâ i scûrs e no aje viodat l’om in tal jet, dut taponât e sudât! "Oh, che il folc us trai, bambin di un om, a son ores che us lin a cirî dapardut e vou achi! Fosse stade vere chê sedule che almancul la vessis fate finide pardabon!". E lui" Ah, Nene,Nene, crude e triste, pouc di bon ti pos clamâ. Fin sciôr Toni di Zilie sci è incuart chi eri malât, cjamât di fiêre e tu bailâmi a dî che no vevi nuie!". Passades quarantevot ores e viodût che la coliche no rivave, Titut sci è metût il cûr in pâs. Il rimiedi, diseve lui, al ere stât in ta sgnape ch’al veve bevude in chê sere che di sigûr a veve vude la fuarce di fâ crepâ la bestie.

tratto dal Bollettino Parrocchiale "La nôste valade"