 |
Sandro Naiaretti |
Dalla raccolta 'Frucons'
La fiesta das mâris
(scarica il file mp3 - 468 kb - recitata da Celestino Vezzi)
Chest ant,
il prin
ch'a na tu sês plui,
j cj voi scrivi
il gno afiet
e j cj lu spedis
diretamenti tal Paradîs.
J cj voi bon,
tant bon,
tant che nissuna grandeca
a lu pò contignî:
né la profonditât dal mâr,
né j grancs monts
nencja la granda vôlta
dal cîl,
mancul cu mancul
las sfondaras
sconfinadas
da tiera.
J cj voi bon,
ma tant bon…
Crodimi
da lassù
e ga ch'j cj scrîf
j cj domandi pardòn
par cuant ch'a tu eras
a caiù…
A tu mi mancjas,
mâri:
a mi mancjant
j tia vôi
che nuia aj sfuìva
e ch'aj cjacaràva
da bessoi.
A mi mancja
il son da tô vôs:
dôlca ta l'unî,
francja tal riclamâ,
stupenda,
unica
tal cjantâ,
strassiànt
tal vaî.
A mi mancja
plui dal dut
la sacrâl solenitât
dal to salût
al viergissi dal portòn:
<<Ioi, šona,
setu rivât?!>>.
Vue na mi dîs
plui nuia nissun…
ma a l'è natuâl,
mâri…
denti di chel portòn
n'and'è plui nissun
ma encja sal fos cualchidun
pôc a mi impuartarès
cenca di te.
Vuê,
ch'a è la tô fiesta,
j cj prei:
torna mâri!,
torna almancul di not
e fami sintî
la bieleca
dal to cjant,
il calôr
dal to salût,
la delicateca
da tô man
che como
ul lisêr fasolet
di fina seda
a ferma
e a suia
il gno vaî.
J cj spiêti
isnòt
ch'a è la tô fiesta.
Domanda al bon Diu
ch'a cj lâssi
tornâ
nomo un moment,
na ch'a cj lâssi
tornâ!
J cj spiêti
isnòt
mâri…
Las mês pouras
(scarica il file mp3 - 152 kb - recitata da Celestino Vezzi)
Tanta poura
da canài
cuant che ta tasa dal fen
i guiavi dal miedi
cui froscs
cun che âta canaia.
Tanta poura di essi cjatât.
Tanta poura
fin da picul
spietà il sabida
ch'al tornàs da setemana
tal bosc
gno pâri
e spes,
strac e strampa,
al vosàva e al imprecàva
e po fuî,
insieme jò e me mâri,
involucats tal so scial,
e durmî
tar un grum di foèt
parât dongja a la buina
tal cjôt clip das vacjas.
Tanta poura
ch'a nu cjatàs.
Tanta poura
da frut
ta mont di Mimoias
a cori davour
ai vigjei spiritâts
tal miec das sêtas
e temporai
sul triàt
ch'al mena sul Clap.
Tanta poura
di no tornâ plui ta casêra.
Tanta poura
da govent
il prin dì di lavôr
ta fària da Pesària
di no essi bon di fâ un colp.
Tanta poura di essi mandât in cjasa.
Tanta poura
il dì chi soi partît
par Trent,
lassant dut,
par cjapâ la Strada
vioduda plui como
un barlump
che como lûs biela e clara.
Tanta poura di fâ una bûsa ta l'âga.
Epò il dì Sant
che il Signôr
a mi a fat so Pastôr
ta imponenca e bieleca
dal Dômo di Cividâl.
Tanta poura
di no essi dencj!
Tantas âtas pouras,
vuê,
gletùdas cun fadia tal sacrari dal gno cuarp
e custodidas dai vôi curiôs
di int pronta a gjudicâ
ma pôc a comprendi,
udâ,
sopuartâ…
Aì as resta
fint al dì
che in somp dal troi
j sai chi cjâti
chel Omp
ch'al sa cambiâ
ogni poura in coragju,
ogni ombrena
in lûs sfondeôsa,
ogni magàgna
in plena salût.
Ma di chê dì
poura propi n'and'ai…
Ce rôba ejsa?
(scarica il file mp3 - 192 kb - recitata da Celestino Vezzi)
Talpadòr
plantanc,
selèt,
penàcju di S. Guant,
jerba spicota,
rôsas salvàdjas,
mùjas nêras,
frint blancja,
claudìns,
lavàz,
grignòn…
<<Ma ce dal gjaul sona,
dulà vivina chês bestias,
cui las aja mai vjodudas,
in ce part di mont si las cjàtia?>>.
<<A è rôba nesta,
jerbas, plantas e sterps
dai nestis prâts,
dai nestis boscs,
vignùda su
cu la storia
dai nestis nônos
e che nô j vin dismenteât,
massa in pressa
dismenteât….
Cjargna
(scarica il file mp3 - 200 kb - recitata da Celestino Vezzi)
Scùnas sui stàis
soteradas da telarìnas;
fâlz inrusinidas
tai cjôts bandonâts;
puartòns ch'ai si clostrant
davour di ogni funerâl;
pez ch'ai cres
tai orts dai paîs;
il non di Diu
bomplan bomplan soterât.
Biats paîs!
Biada Cjargna!
A tu âs resistût
a fan,
a gueras cenca fin,
migrassions,
teremots…
Signôr, uda la nesta int
a continuâ la so storia
par scolpî,
tas mûsas di frescjas generassions,
il gust di vivi,
di lavorâ,
di restâ.
Credi cjargnel
(scarica il file mp3 - 456 kb - recitata da Celestino Vezzi)
Credi di no tornâ plui a
partT,
credi che las radîs
a son inmò nòrbias,
credi che saludant pas stradas
na scambi il fî pal pâri,
credi che dut a podi tornâ
a cressi sot i mia vôi…
Credi che la vita a è fata par vivi
e che nomo âgrimas na po' parturî.
Credi che i cjamps
n'ai si bûti plui in prât,
credi che la côt
a podi tornâ a gucâ,
credi che âts puartas
na si vêbi plui da sierâ.
Credi che di là
al è biel
encja cuant che achì
al è un vivi tal patî.
Credi che il gno vuê,
ma encja il doman,
al è tas tôs mans,
Signôr!
