 |
Luigi Dereatti |
Timp d'Otobar
(scarica il file Mp3 - 214 kb - recitata dall'autore)
Fumàte basse
ploe minudine.
I arbui a tachin
a disvistîsi,
encje il nosti
umôr l'è scûr.
Ma di colp
un rai di soreli
al sbarnìce
chê scure fumàte,
il mont torne
a vìvi:
a rît la pedràde.
Dut
dure un moment,
sìn colâz
un'âte volte
' ta l'avilimènt.
Ce strani pinsîr
cheste a è
la Cjargne
di vuei e di
îr.
Un toc
di strade asfaltade,
une roste stropàde,
un gnûf puest
di lavôr,
par un momènt
nùs samê
che la Cjargne
a vèibi
finalmenti splendôr.
Sòn nome salùstris.
La int
continue a lâ vie
come las fuês
dai arbui
d'atom.
Rumôrs.
(scarica il file Mp3 - 219 kb - recitata dall'autore)
Rumôrs di pàs,
samèe che ducj
sêtino in viaç.
A pît come une volte?
No
no interèsse.
Son i pîs di frùts
di vecjos
di zovins
di malâts.
Son suspîrs
son laments.
No no
son pàs di int ch'a cjamine
bel plan, di corse.
No no
son pàs strascinâts,
son ridàdes
son porconàdes…
No no
son pàs.
Son bussades.
No,
son sgrifignades.
No no
son pas, rumors di pàs.
I pas a cjaminin,
no vain
no ridin.
Son nome pàs,
rumôrs di pàs.
Pàs di int ch'a va.
Ch'a va indulà?
Forsi no sa nencje iei
ma a va.
Son nome pàs,
rumôrs di pàs.
Ogni tant
(scarica il file Mp3 - 177 kb - recitata dall'autore)
Ogni tant
vorès scierâ i vôi
e fìi da mê cjere
sintîmi
âghe, clàp,
plante…
Sparìi
tas fumates
da tom
e giuâ cui
guriùts dal bosc.
Jèssi ucèl
tal cîl celest,
lassâmi niçiulâ dal vint
ch'al vèn dal nuje.
dal nuje?
Ecco l'eterne domande
cha scjàsse
cun farce
il pinsîr:
dome materie
o "Creato"
il prinzìpi di chest
sistème.
A gleisie di San Pieri
(scarica il file Mp3 - 193 kb - recitata dall'autore)
Come simpri
i torni a cjatâti
cuant chi tu seis
cence crous inflochetades
cence organos ch'a sunin
cence gjespui o rogazions.
Tu mi plâs cussì :
Cidine cui tiei scjalìns in piêre
cidine cu las tôs cjampànes
cidine cui tiei muarts
cidine in ta tô imponence.
Cidine.
Ma encje cheste volte
in dut chest cidinôr
tu às vût il moment
par dîmi alc.
La neif a crice
(scarica il file Mp3 - 191 kb - recitata dall'autore)
Sot las scarpes
la neif a crìce
ta sere freide
cul vint di bovadice.
Lusôr di lune
impiade in cîl:
il freit ti entre ta cjar
svuessanti:
lassanti arie,
suspir, lament…
Par un moment
encje tu tal cîl
fra tantes stèles
ch'a ti cimìin.
E vous ch'a clàmin
ch'a cjàpin forme:
mûses di irlâti
di vuei, di îr…
Ma tal moment
che tu tu vâs par strengi
chei afièts profonts,
lôr sòn già lâts…
La nèif a crìce
sòt i pîs glaçâts.
Moments
(scarica il file Mp3 - 170 kb - recitata dall'autore)
Son moments
ogni tant,
che tu ti sints
spoât di dut.
Come arbul
in plen invier…
Ti samê
che chê arie
di indiferenze
ch'a ti sòfle intor
ti crêvi encje
i ultims ramàz
di sperance.
Une pàche
su pa spâle,
doi vôi
ch'a ti cjàlin d'afièt
e chel arbul
si sint plen
di vìte.
L'aiar frèit
di une ète virtuâl
ch'a cîr
di puartâti vie
la profonditât
dal to ièssi,
di colp l'è sparît.
Tu seis pront
par un'âte
stagjòn
da tô
vite.
Tu sèis
(scarica il file Mp3 - 135 kb - recitata dall'autore)
Simpri
I ti ài 'tai vôi,
ch'al sêti invièr
o primevère,
cun chel vistît
di sède curt
sôre il genôli,
bièle
fra las margherìtes
ta braide:
rôse encje tu.
Encje se
une tasse di agns
a sòn passâts
tu sèis
come il sorêli:
simpri lûs
fuarte e cjalde
pas stagjons
da mê vìte.
Un sbati di svuales
(scarica il file Mp3 - 194 kb - recitata dall'autore)
Zornade nere
neules di denti e di fûr.
I vuei cjaminant pal broili
cun chesç pinsîrs tal cûr:
Gueres
int ch'a si cope a vinç ains,
fruts butâts vie apene nassûts.
Parcès
ch'a pesin denti come taes.
…E no vei sapiens avonde
par tirâles vie…
Un sbati di svuales
une sisile ch'a passe davant.
Me l'àstu mandade Tu ?
L'è stât chel sbati di svuales
a puartâmi la primavere tal cûr.
