Ciacarànt in Placiûte

di Paola Fior

LABORATÔRI FURLÀN DI IVREA E CANAVESE

La prima cimiàda cul Friûl canavesàn 'a è stada a Ivrea, trei agns indaûr, tal curtîf di Placia Ottinetti, sot un arbul, dapît di un palco dulà chi vevi interpretât pouc prin "Maternitât", di me agna Lucia Scoziero, cun Neris Montanari - cjala ce câs Milanêsa - ch'a la voltava par taliàn cul sorêli tai voi. (I vevin mostrât ce ch'i vevin imparât in tuna scuéla di teatro). Po ben: sot chel arbul una sciora 'a mi ven aprûf e 'a mi dîs: "'A cjacare avonde ben il Furlàn." 'A era Giuliana, che dopo di che dì 'a
mi à telefonât e fat cognossi i amîs furlans, cussì, "cjacarant in Placiute".
Nuja mâl, ce ch'al à parturit il grim di che poesia!
Di chel moment nol è stât scjamp. I voi 'a nus lûsin a duc', quant ch'al ven fûr il "tema" di rindi. 'A nus ven la smania par cjatâ fûr i tocs di léi. Jo 'j partiss menant la coda a mulignèl como i nemài dai fuméz, 'j romp l'anima a duc' (e chei dal Fogolâr 'a lu san ) par sbisigâ e sgarfâ, fin a parâ fûr dal côf una citaziòn o un alc di léi ch'a cjacarin di cà e di là das rïas, encja s'j sai che 'a saran in póucs a scoltanus. 'A mi pâr di voléi proferî il miéi e miôr ch'i poss, a cui e a ce no lu sai nencja jò. Ma ce éisa che smania ch'a mi cjapa, chel grop tal cuel mulisìt e legri, tant véi tas grifas un coss cun tanc' poleciùz piulanz, apèna fur dal scuss, lizêrs e delicâz, e savéi d'istint, cun gjonda e póura, como quant ch'al nass un amôr, ch'a si à di fa vitas par continuâ a sintìju, e si ju trata como cristàl? (Vadì ch'a trima la man ch'a ten su il sfuéi…)

Achì 'j cjali il Monviso che, màscima tas zornadas netadas di gnot dal aiaràt, 'a mi ven incuintri distacansci dal cîl e da tiera, lusint tal so capòt d'invièr, cu la so forma ch'a cjapa dentri la vita, (e se Maometto:..) e 'j cjacari cu la piera neta e sgrifiàda da l'Amariana.
'J rivi a scuéla, clamada in tuna classa da mestra par cjacarâ dal Friûl, (cjamada tant che un melâr di costùm, vilotas, scarpéz, poesïas, cjavedalùt, Pirona, geùt e cossùt) e i fruz, - tanc' pìciui Macarios e Totò - 'a entrin di bessoi tal cûr dal gnûf lengàz e 'a mi domandin cui voi ch'a no san se crodi o no: "Ma davvero i bambini in Friuli parlano così?". E jò 'j ài denant i miei pinùz di Virc o di Fraelà e, ta l'anima, l'essincia di duta la canàja dal mont, encjamò blancja.
Eh, sì: blécs di Friûl ch'a gjontin e 'a si misclìcin cun âtas piéls, su la cjarta das stradas e sul mantîl da nesta vita.
Chel Friûl ch'al si cjata un póuc dapardùt, un tic achì, ta qualchi peràula nassuda insiema cuissamai quant, un tic alì, in tuna usancia di fiésta o di lavôr, un tic alà via, in tuna vòngula di cjant o di dolôr.
'J cróut che i Furlans 'a vebin un dai dieneâs plui sciors di chest mont, e che 'a no sarà mai pussìbil clonàju…
Ècomo: cumo 'a mi pâr di véi capît di dulà ch'a riva e ce ch'al é dut chel fermènt: 'al é chel furmiâr vecjo di sècui ch'al sta cuiét tal so cori e ingrumâ pa metròpoli e che, quant ch'a 'j ven alciada la pièra encja domo un póuc, al taca a mòvisci como l'âga cul fûc sot da pignàta, ch'a finìss jéi par fâ balâ e cjantâ il tapòn.
Chel vapôr, libar, al daventa lavôr di lambìc. Alc di ufrî como una prejèra.
E chel fâ di lambìc al è un "ritirâsci ogniun ta so Placiuta", par podéi cjatâsi insiema in Placia dal Domo, como ta cjalda zornada dal Solstìzi d'invièr.