 |
"MISSUS"
A è une tradizion proprie dal rît aquileiês: intai nûf dîs prin di Nadâl la int a si cjate in gleisie par preparâssi a vignude dal Signôr. La novene a tache cul cjant dal Missus che ati a nol è che il toc di Vanzeli chal conte da Anuciazion dal Agnul a Madone (Lc 1, 26-38), e po a continue cun preieres e cul cjant dal Rorate, la melodie a po vê das variants in paîs diviers, ma a no cambie di tant.
Da une interviste fate a pre’ Josef Cjargnel, da Pleif di Guart
|
|
|
|
|
|
"BENEDICTIO MAJOR SALIS ET AQUAE"
La benedizion da l’aghe e dal sâl ch’a contin i vecjos, biel dal 1300 a vignive fate a Cividât, inta dì da fieste di Sant Marc.
La struture a ere chê da Missa Sicca, ch’a ere celebrade, inta Ete di Mieç, come la noste messe, nome ch’a no vignivin metûts denti l’Ofertori e la Consacrazion.
L’usance di benedî l’aghe la vee da Pefanie a rive da Palestine.
Intal IV secul in Orient a ere l’usance di batiâ oltre che inta not di Pasche, encje a Pefanie, che inta tradizion orientâl a coincideve cu la fieste dal Batisim di Jesù.
Dopo, il rît al è rivât fint a Aquilee, forsi traviers da Glesie di Grau, ch’a ere restade adalunc sot dai Bizantins.Intal 1890 chest rît al fo abolît da Congregazion dai Rîts.
Dopo che i fedei a vevin protestât, però, encje se tant plui curt e cence i riferiments al Batisim di Crist, al è stât tornât a meti sù. Il rît, in dì di voi, al à la stesse struture di chel antîc.
Da A. Persic, Benedizione dell'acqua nella vigilia dell'Epifania, Arcidiocesi di Udine
Riguarts de siore Catin di Cosset (1914) di Darte
La vee da Pifanie, prime ch’al vegnìs not, a si lave ducj in gleisie cuntun gondul di aghe, une prese di sâl vuluçât intune cjarte… chei ch’a stavin miôr a lu puartavin poât suntun platut di crep o, chei ch’an podevin vei tant, an puartavin encje un capuç intîr; a si puartave encje cualchi melut e cualchi cocule. A si poave dut su pai scjalins dal coro, sù dut ator a tor dal altâr maiôr (in chê volte a nol ere l’altâr piçul tal mieç) e po i si sentavin intai bancs. Il preidi al ere vistît di blanc, cul piviâl, e chei fruts a puartavin sîs cjandeles impiades e il turibul cul incens: a ere une funzion lungje parce che prime a si cjantave gjespui, dopo il preidi al faseve un toc di messe, fint a predicje, dopo a si cjantavin las litanies e finalmenti il preidi al benedive il sâl e cun chel al benedive l’aghe… das pomes i no m’impensi ce ch’al faseve…
Il sâl e l’aghe ju puartavin a cjase: l’aghe a si la meteve a cjâf dal jet par insegnâsi e un tic a si la tignive par cualchi mâl, cul sâl a si faseve la mignestre e un tic a si lu meteve encje tal bevaron dai anemâi.
|