Las viles 

 

La Cjargne a ere dividude in cuatri Cuartîrs, un par ognune das valades plui impuartants. Sant Pieri (val da Bût), Guart (val dal Dean), Socleif (val dal Taiament) e Tumieç. 

Tumieç, in gracie da sô posizion geografiche (al è poiât dulà che la Bût, il Dean, la Fele e il Taiament a si unissin), al ere privilegjât ta Provincie da Cjargne. A Tumieç al viveve il gastalt. Il gastalt al ere il puartevôs dal patriarcje e, dopo, da Republiche venite. I siei compits plui impuartants a erin tirâ las tasses e ministrâ i bens, prime dal Patriarcje e dopo di Vignesie. 

Ogni Cuartîr al veve un cjapitani. Il Cuartîr di Sant Pieri al ere dividût in doi: sôre e sot Randîs, e al veve doi cjapitanis che a vevin ognidun il control su pa sô zone; però a vevin une sole vous ta riunion da Provincie da Cjargne. 

I cjapitanis a vignivin elezûts dai meriga (o scindics) das viles dai Cuartîrs. I meriga a vignivin elezûts da ducj i parons di cjase, intune samblee: la Vicìnie.  

La Vicìnie a ere l’organisim plui impuartant dal Comun (o Vile). A si dave dongje intune maniere tradizionâl, dopo che un bandidôr al veve sunât une cjampane, intun puest za decidût: d’estât sot di un tei, e d’invier o ta cjase comunâl, s’a esisteve, sedinò intune cjase dai oms di “Commun”. I vicins a cjacaravin di dut ce che al riguardave il Comun, a controlavin i bens coletîfs, ch’a erin di ducj, a elezevin chei che a fasevin part da bancje (Zonte) e il meriga.  

Divierses normes scrites e orâls a fasevin funzionâ la samblee e a procuravin che i vicins a no fasessin matedâts. 

 

Par cure di Alessandro Di Bert e Giovanni Silverio 

Da S. Barbacetto, Tanto del ricco quanto del povero, Coord. circ. cult. Carnia